【中環】鄭欣宜雖然近年體重有反彈迹象，不過絕對冇影響佢嘅異性緣喎！自從早年同外籍男友Mark Ryan分手後，欣宜身邊都出現咗唔少異性，當中有傳過佢媾掂大隻韓籍模特兒崔豪晉（Jin），但呢段霧水情緣維持咗唔耐就冇咗下文，但欣宜不愁寂寞，去年中喺教會認識任職潮流雜誌攝影師Silas Lee，兩人打得火熱。
斟茶遞水
近排工作唔多嘅欣宜大前晚喺中環夜蒲，佢同個女仔朋友喺夜店門口吹水，傾傾吓又打電話唔知係咪call多啲朋友嚟玩？不過除咗有個女仔朋友外，男友Silas原來都喺度，眼厲嘅欣宜發現有狗仔隊喺門口即通風畀男友，結果Silas表現避忌，成日匿喺舖頭入面，但難得欣宜同位女仔朋友傾得不知幾開心，傾到興起仲動作多多。
雖然之前欣宜同Silas俾人見到曾經耍花槍嗌交，但好彩冇影響雙方感情，Silas知道欣宜同朋友喺門口狂吹水一定會口乾，所以最終都唔忍心攞杯嘢飲出嚟畀女朋友，跟住仲停咗一陣望住欣宜傾偈，成身紋身嘅Silas估唔到又會咁情深。唔單止欣宜感情有着落，爹哋鄭少秋同官晶華生嘅同父異母妹妹詠恩，近日都傳出同富商林建名嘅仔林孝信撻着，戀事多籮籮。
採訪、攝影：徐錦池、朱志聰、潘冠恩