粵海置地（124）賣咗金威啤酒之後，廠房原址係金蛋，龐大增值喺後頭，加埋集團作為廣東省政府直系房產旗艦，肯定被湊大。而集團仲喺一年低殘價上落，有買趁手。
酒廠原址發展潛力大
粵置前身金威啤酒，上年出售啤酒資產兼改埋名，主打房地產，而原先羅湖廠房將會改為商住物業。酒廠原址，正正坐落深圳市中心「布心片區」，喺深圳地鐵布心站及太安站附近，絕對係黃金地段，好巴閉。
資料顯示，粵置呢壇製作分三期，總樓面面積約500萬平方呎。而上年6月，粵置物業、廠房及設備總值26億港銀。就當呢筆數全歸「布心片項目」，呎價都係得520蚊，係鹹豆價，兼完全未反映靚仔增值。
係咁意以項目每方呎增值4,500蚊計，粵置已經可以增值23億銀，或每股1.35元，幾乎追貼現價（1.47元），NAV上到4.1元，折讓64%。
此外，同系的粵海投資（270），亦手執唔少靚物業。忽發奇想，大家份屬同系，粵置又變身房產旗艦，粵投手頭嘅房產，又有冇機會過畀粵置呢？家陣粵投嘅投資物業總值，講緊高達99億銀，係粵置總市值近25億銀嘅4倍！粵置現價要大升2.9倍到5.8元，先去到呢個總值。粵置係等湊大。
阿媽粵海控股，揸咗粵置近74%，Genesis Fund另控7.8%，集團街貨權益得18.4%，約3.15億股，等值4.6億銀咁大把，要湊大，容乜易？
粵置上返上年9月高位2.5元，要升70%，PB仲係得0.6倍，剛啱先追到深圳窗口嘅深圳控股（604），但總市值仍然得43億銀，只係深控140億銀嘅30%。
錢雋
細價股專家
本欄逢周二、五刊出