社聯噚日舉行銀徽企業嘉許計劃啟動禮，請來已經係長者嘅周一嶽同準長者飲食界張宇人，齊齊做嘉賓撐場。今年9月就65歲嘅張宇人，就喺一眾當年有份賜佢「廿蚊張」稱號嘅社福界朋友面前，自嘲好快貶值成「兩蚊張」，有得同周一嶽一樣，齊齊拎住張綠色八達通卡，用兩蚊搭車周圍去。
佢仲同在場老人家落足嘴頭，話飲食界要整多啲啱老人家口味嘅健康餐，又話飲食業多多老人家都請，貪佢哋夠忠心喎。𠵱家飲食業缺人缺到最低工資都請唔到人，唔知佢係咪打算畀最低工資老人家？轉頭佢又同周一嶽講，食物標籤要整大啲畀老人睇，似乎佢真係年紀大，唔記得周一嶽𠵱家已經唔係食衞局局長，家陣做緊平機會主席喇。