梁振英女兒利用社交媒體去spin輿論，囗徑與建制派及黨媒一致，試圖將劉進圖遇襲與新聞自由切割，只不過用慣手勢，打多咗個「lol」，先至被插涼薄。有人話係佢個女發表個人意見，我就唔多信，因自從新任新聞統籌專員馮煒光登場後，便愛以其他身份發表「個人意見」，包括「歷史學博士候選人」、「金鐘人」，甚至以真身踩入群組內搭訕，指李慧玲記者會冇料到等。
用家人做政治show 早有前科
由此可見，利用個人身份或分身方式去打輿論戰，乃今期梁振英政府戰術，特首辦中人利用梁小姐去反擊「新聞自由空前受壓論」，絕不出奇。加上梁有前科，愛用家人做政治show，不單競選時，當選後在馮煒光策劃下，用聖誕送路姆西畀個女做禮物，寫成網誌，以化解路姆西事件帶來之羞辱。大家可見，至今梁小姐及其父親均未有澄清此乃「個人意見，不代表特首本人立場！」實在令人懷疑。如果今日習近平個女在微博發佈「昆明車站殺人事件未有證據證明同疆獨恐怖襲擊有關」，再加上『lol』，你認為大家會否當「細路女唔識世界」看待？
梁上場後政府變成無規無矩，乃公認事實，梁小姐撲出來為父spin傳媒，充份反映「無規無矩」乃特區第一家庭之本性，由此人物執掌大權，香港唔衰都幾難。
英治由八十年代開始走向善治，並非靠制度保障，係靠人治，靠英國民主體制在背後監督，靠政務官精英自重。「橘逾淮而為枳」，橘生於淮南，味道好，移植淮北，果味變壞。基本法根本對特首冇約束，黨同伐異、自把自為，即使內地官員勸告，亦可視若無睹。而承襲自殖民地嘅行政主導體制，總督權力也極大，內部無法制止其濫用權力。
特首在推動政策方面是無能之人，一來佢施政理念粗疏，亂搞一通，班底又超弱兼騎呢，受制於官僚集團，加上行政立法之間冇橋樑，政府在議會內冇票，寸步難行。但在搞權術政治方面，佢就大權在握，可以亂嚟。從政當然有權術一面，但此手段只能服膺於更大目標，如實現醫療改革，打破既得利益而勇於鬥爭。當權術變成唯一目標，打擊政敵、整治反對傳媒，只為鞏固自己權位，只為分派利益，此時政治越趨惡質化。
香港政治惡質化，始於2012年特首選舉，既然旁門左道成功令到梁當選，令中央最終拍辦支持佢放棄唐英年，呢套手法就證明有效，自然會繼續用落去。
當政策上越無所作為時，梁氏政府心思都往權術政治一邊鑽，政局只會一步一步惡化下去，北京已不可能再袖手旁觀。
添馬男