「戰神」艾華遜3號球衣，永存費城主場！NBA球隊費城76人，上周六喺主場對巫師嘅常規賽半場期間，為艾華遜舉行高掛球衣儀式；76人仲向佢送上冠軍腰帶，令戰神總算一圓冇冠軍指環嘅遺憾。
由於76人今季戰績低迷，主場富國銀行中心已經少有爆滿盛況，不過上周六主場對巫師，就吸引咗兩萬人入場；當然佢哋主要唔係為咗睇波，而係見證一代戰神艾華遜嘅高掛球衣儀式。喺1996至2006年同2009至2010年期間，艾華遜兩度效力76人，仲帶領76人殺入2001年總決賽，加埋MVP、4屆得分王、11次參加明星賽等榮譽，球會將艾華遜嘅3號，列為繼「J博士」艾榮、巴克利等名宿後，第8位榮休號碼嘅球員，絕對冇人會質疑。
多謝球迷「你哋好愛我」
半場休息時，戴住黑框眼鏡嘅艾華遜再次踏足場上發言，雖然多次斷斷續續，不過都可以強忍淚水，艾華遜話：「我向麥基（前76人隊友）保證，今晚我會好好控制情緒，唔會再喊。我首先要多謝米高佐敦，佢為我帶嚟夢想；多謝Tawanna（艾華遜前妻），她令我成為一個男人，喺我做職業籃球員期間，好好照顧我嘅家庭。仲有拉列夫、莫湯保、拉利曉士等隊友，你哋激發咗我嘅潛能；最後多謝費城球迷，我知道你哋好愛我，而我相信呢個係互動。」比賽同榮休儀式期間，亦不斷播放艾華遜舊隊友、教練等人嘅留言，最特別當然係戰神嘅恩師、前76人教練布朗，布朗表示：「感謝上帝讓我可以執教你，我為你感到驕傲。」
主隊慘敗連輸13場
今年38歲嘅艾華遜，球員生涯最大遺憾始終係同NBA總冠軍無緣，今次會方亦特製咗一條好似拳擊比賽嘅冠軍金腰帶送畀戰神，總算有少少安慰。講番場比賽，76人主場以103:122大敗畀巫師，累積13連敗，季後賽基本無望；要寄望另一位費城挽救者誕生，或者係新秀卡達威廉士啩？
