假如我係梁振英，長和系業績會真係會睇到眼火爆，做特首咁耐，從來未有記者以「好高興見到你」作開場白，仲要唔只一個，自己睇演唱會仲俾萬人狂噓。望望媒體的即時新聞，全文盡錄，幾可媲美奧巴馬的國情咨文，平時特首回應畀盡都係兩條新聞咁大把，但這不能怪傳媒，話晒超人即時新聞動輒都有過萬點擊率。
上周五簡直係李氏家族新聞日，除長和系業績會，仲有電訊盈科（008）舉行特別股東會，旗下香港電訊信託（6823）收購CSL的建議，獲股東以99.98%通過，證明股東buy小小超「好草不怕回頭吃」的方針。
2000年初，電盈為減債，將CSL股權賣畀澳洲電訊公司Telstra，套現179億元，12年後只需畀多唔夠10億元就能夠買返全部股權，若果閣下在2001年買入一個將軍澳單位，今日單位都升值兩倍，單刁睇落好貴，但學超人話齋「時間都係成本」，較當日賣出價高5%就成為全港最大流動電訊商，抵！
小小超近年也非一帆風順，美國電動車公司Fisker單刁就慘遭強國集團奪愛。呢次就憑撤司法覆核翻撻舊愛，自動「繳械」交出更多頻譜的「大龍鳳」顯示，小小超仍覺得本港電訊市場有得做。電盈上周五股價終突破九個月橫行區，有望重拾升浪。
Samantha
本欄逢周一、三、五刊出