來自拖肥的莫耶斯，不但沒有《來自星星的你》中都敏俊的超能力，經這8個月觀察，兼上周中歐聯敗走希臘，其戰術落伍、調動乏術，莫說超能力，直情係冇能力。他和費Sir其中一個分別，體現在處理另一位「來自拖肥的你」──朗尼之上。同樣來自愛華頓的朗尼，有離心兼年近30，費Sir對其態度係「冇咗冇所謂」，亦深信可找人取而代之；莫帥剛好相反，係「冇咗佢唔得」。除為宣示「少個主力跳船」，還因沒整體戰可言的曼聯，非常倚賴他的個人入球能力。30萬鎊超高薪簽5年約，除莫帥外，冇人覺得值。
其實不能怪晒來自拖肥的人。費Sir自傳中的序寫到他退休那天，回想曼聯生涯最關鍵一戰，非1999年的歐聯決賽，亦非首奪聯賽冠軍1992/93球季中任何一場，而是1990年英足盃第3圈，爆冷擊敗當時勁旅諾定咸森林，令當時已8場不勝的他不至被炒，以及後來贏埋當屆英足盃而有得留低，建立王朝。
費Sir認為曼聯王朝是「捱」返來的，故他挑選與他同樣捱得的莫帥，認為只要給時間，讓他像自己般捱幾季，曼聯便可上軌道。可惜，時代變了。費Sir忘了當年曼聯只是中游分子，贏歐聯不會是目標，不用處理一大班國際球星，不用面對班費過億的對手。現在帶領世界級大會，只有曾於4大聯賽贏過聯賽錦標的教頭，才有資格。
方柏翹
now足球評述員