NBA熱火前鋒勒邦占士因為鼻骨受傷，上周四戴住個全黑保護面具對紐約人，俾傳媒稱為蝙蝠俠化身；或者聯盟唔想大帝太高調，喺上周六主場對魔術嘅佛羅里達州打吡，唔准佢再戴黑面具；大帝就戴番個透明面具，隊友保殊仲寸佢變咗平常人。唔知係唔係冇咗蝙蝠威力，占士今仗只得20分，好彩隊友獲迪貢獻24分，熱火仍然輕鬆以112:98擊敗魔術，取得7連勝。