是夜,狼英越洋致電其他人,大興問罪之師。
「喂,是我,我想問你……」
「Who are you?」
「撞鬼你!我係邊個唔駛問expert都知啦,我係你Daddy!」
「Sorry,乜原來daughter嘅中文係譯做『其他人』咩?咁你叫媽咪係咪叫做『其他女人』?」
「你知唔知你闖咗大禍!」
「一個其他人嘅言論,點樣可以影響到你呢?」
「你Daddy我幾辛苦搭好個戲台,上演一幕與香港人心連心的大戲,再刁鑽嘅反對派都無位指控我。家陣你好嘢啦,一腳踢爛我嘅戲台,個個都話我狼父無犬女,無端端做咗呢件事嘅大反派。」
「Daddy,我驚啲人將件事燒到新聞自由,搞成係政治事件,到時你麻煩咋。」
「傻女,呢啲嘢少擔心。傳媒老闆有幾齊心,我最清楚。件事發生嗰日係財政預算案,第二日好多份行中產路線嘅報紙,將嗰份無新意嘅預算案做頭版,有啲直情放AV仁係封面㖭。嗰單血案,梗係放內版啦。傳媒好識做,自動幫手cool down。」
「Daddy,必要時叫嗰個韓星出嚟幫手。」
「邊個韓星?」
「金鍾仁!叫佢放料,將襲擊案定性為挑戰法治嘅傷人案,無關新聞自由,唔好俾反對派上綱上線。」
「我就嚟炒咗呢個金鍾仁!三個字:不知所謂!咁快俾田少識穿身份,仲要用真身嚟Like你嘅FB留言,我拚命set防火牆同你劃清界線,個傻佬係要瓜田李下!倒米!」
「Daddy,點樣可以令市民唔信血案同新聞自由有關㗎?」
「放心,我會搵人做嘢,以中立理性為名,要求反對派拿出證據來,無證據就唔好含血噴人。」
「當然,話佔中會搞亂香港呢啲說話就唔需要拿出證據啦。」
「總之,有啲說話唔駛自己講,自然有其他人講。」
「我咪其他人lol……」