【專訪】
與「地產佬」談藝術，看似風馬牛不相及。曾任嘉華（173）、恒基中國（已私有化）、瑞安集團高層，現任新昌營造（404）及藝發局主席的王英偉，卻多年來一直尋找地產與藝術的交叉點。他認為，新一代大孖沙「浸過鹹水，對藝術越來越有興趣」。
記者：鄭柏齡
身為電影發燒友的王英偉，90年代初棄官從商，先後任嘉華副行政總裁、恒基中國董事總經理、瑞安副主席等；他近日以香港國際電影節協會主席的身份，接受本報專訪，暢談從商廿多年，本港財團看待藝術的微妙變化。
信置黃敏華欣賞藝術
「初初做嘉華，當時成個社會氣氛，都唔重視藝術文化」，王英偉解釋，上一代大孖沙曾經歷戰亂，考慮商業贊助時，往往從社會醫療、教育上出發，「好似响恒基工作時，李兆基特別鍾意起學校」，他又指，「點解唔搞藝術？因為你贊助咗之後，好難劃出邊啲人係受眾，睇唔到效果」。
在王英偉眼中，地產商漠視藝術的態度，近年出現變化，「第二代好似Adrian（鄭志剛，新世界執董）、黃敏華（信置總經理），喺外國讀過書，對藝術嘅睇法，佢哋本身都鍾意，同埋識得欣賞藝術品」。他舉例，鄭志剛每年與藝發局合作，贊助短片比賽「鮮浪潮」；黃敏華更加是他在藝發局內的委員，一齊推動本地劇團發展。
香港發產商被指「地產霸權」，容易與本地藝術家產生矛盾，但王英偉認為，兩者關係密切，缺一不可，「建築本身已經係一種藝術，有啲優質嘅發展商，強調重視藝術，放好多油畫、雕塑入去。講贊助嘅話，前幾年個畢加索畫展，淨係買保險都幾億，冇地產展贊助一定搞唔成」。
王英偉承認，香港社會價值觀「講賺錢」，地產商向股東交代，「藝術贊助永遠都唔夠」；但撇除金錢，他更希望企業「埋身」推動藝術發展，「藝術家好多時淨係識創作，會計、法律、行政管理等，商界都可以幫手」。
對政府態度僵化失望
他強調，推動藝術過程中，政府角色最重要，但他不只一次受當局制度僵化而失望，「土瓜灣牛棚後面塊空地，我哋一直想發展成香港嘅『798』（北京藝術區），但政府話附近有煤氣鼓，唔批」，不少劇團有意進駐工廈空置單位，但消防條例要求全棟大廈更新防火設備，「好難搵到所有業主同意」，最終打退堂鼓。王英偉擔心，長期重視經濟發展，而忽視藝術，「生活冇文化，社會就失去靈魂，香港會冇晒特色」。