話唔急住上市嘅茶記太興呢排係咁賣廣告，慶祝成立25周年，搵咗Eric Kwok扮Iron Man都唔夠，新近同港龍航空合作，喺飛機上供應罐裝港式凍奶茶。對手翠華茶餐廳（1314）就冇乜所謂，主席李遠康好大方咁話，歡迎對手將茶餐廳文化發揚光大咁話。
太興推出全新包裝嘅罐裝奶茶，喺港龍每星期超過400班航機上供應，由即日起到8月底，所有乘客都可以免費嘆茶。太興主席陳永安早前曾經透露，「冰鎮奶茶」其實由佢哋自創，對手都係抄佢哋條橋。
今次太興衝上雲霄，唔知翠華有冇計劃跟住做，例如將招牌奶油豬送上機呢？李遠康回應話，暫時冇計劃跟航空公司合作，亦冇打算推出罐裝飲品或者食品；不過，佢認為將茶記食品帶上飛機係好事，可以推廣香港茶餐廳文化。