先要多謝三胞胎爸爸在面書回應及分享這則報道，否則我就走寶了！是咁的，話說有調查發現不少本地大學生自認學習態度懶散，超過七成受訪者直認因「偷懶」及「冇興趣」所以遲到或曠課。有圖有真相，除了有相還要表明身份是浸大文學院一年級生的Chris坦言常曠課，「我住宿舍，冇父母督促，起唔到身就唔返學，淨係上學期走咗幾多堂都數唔清！」
為吸引學生早起上第一堂課，有人稱「齋sir」的浸大宗教及哲學系高級講師陳士齊，會向學生派免費早餐之餘，更為學生遲到解釋，即是掩飾，皆因「現時大學科目太多，常有『天地堂』，令學生進退兩難」所致。
講師都係人做嘅只係工一份，要開飯就要保住飯碗豈敢得罪米飯班主？所以除了請食早餐，更出動派考試貼士等奇招，只求學生畀面出席，講師們定必準時又隨時候教，保證呼之則來揮之不去。
那些不識好歹時務自以為是膽敢以扣平時分、記名等懲罰學生的講師，在劣幣的驅逐下肯定很快消失，絕對站不住腳。學權高漲，廢青當道所向披靡，大學跪低後生可畏好嘢！
浸大回應話學生遲到15分鐘「可」被列作缺課，未經批准而缺席率高於百分之十五，該科目「可」被評為不及格。那個「可」字，可圈可點！港大就話除上堂外，部份課程會要求學生作專題報告，學生缺席不參與，或影響成績。即係點？我不明你們明不明？中大則稱相信學生會對自己行為負責，各學院或教師會有不同方法處理遲到曠課。果然高明，答咗等如冇答。
港大中大排名遠高於浸大又如何？今次贏到開巷，我不得不對浸大「真正直」另眼相看，真係正到冇朋友！
張慧敏
http://www.facebook.com/HKcareerdoctor