日前剛過47歲生日嘅王書麒，37年前仲係細路仔時，同當時嘅童星路家敏拍70年代港台經典劇《小時候》，呢套劇當年口碑唔錯，都算係集體回憶，港台就決定下月喺港台數碼電視頻道重播，到時一定勾起觀眾那些年嘅感覺。
書麒同路家敏喺《小》劇中扮一對兄妹，感情好好，王書麒𠵱家更已為人父，佢娶咗許秋怡，佢哋個仔Cody都10歲，正好係佢阿爸當年拍呢部劇嘅歲數。港台重播都係想搞啲噱頭，最想當然係書麒同路家敏出嚟宣傳，不過路家敏𠵱家喺政府部門做嘢，唔方便出鏡，所以港台只有打做緊藝人嘅書麒主意。據知港台暫定播40集，每集都加啲新嘢，邀請書麒重踏當年拍攝現場緬懷一下。
翻睇劇集落淚
書麒日前隨攝製隊去咗大埔火車博物館同瀝源邨拍外景，佢話：「有一集係講我為咗𠱁小敏，買咗條金魚畀佢冇錢搭火車返屋企，要由旺角火車站行返沙田，呢幕好感人，所以導演就安排我去火車博物館影番舊式火車。」書麒自爆當年睇有喊，事隔幾十年，佢話：「我前幾晚翻睇又喊。」書麒話重播時會同囝囝Cody一齊睇。
撰文：馮仁昭
