證券業老行尊、曾任聯交所理事嘅余維強（圖）破產一個月，最近恢復自由身。
事緣佢任執董兼行政總裁嘅瑞豐石化（8096），之前借落太陽國際財務2,000萬元未還晒，余維強作為其中一位擔保人須孭上身，故於今年1月27日被高院判定為破產。
但太陽國際之後向瑞豐主席陳偉能轉讓貸款協議之下所有權利，余維強就向高院作出申請。
瑞豐日前發出通告表示，高院已於上月21日撤銷余維強嘅破產令。破產一個月極速回復自由身，公司亦重新委任余維強做執董兼行政總裁。
余維強現年61歲，從事證券業超過30年，作風低調，業內80、90後未必識佢，佢於1993年至2000年係聯交所理事，又做過合併後的港交所（388）非執董三年，同港交所前行政總裁周文耀係好朋友。