早前輸到一仆一碌嘅紐卡素，繼前一輪英超主場小勝阿士東維拉1:0後，上周六又作客4:1大勝侯城，兩連勝本來就話應該慶祝一番，點知領隊柏度就整單受盡千夫所指嘅大鑊嘢出來，無啦啦出「施丹頭槌」撞對手中場大衛美拿，搞串晒個派對。
話說對侯城場波踢到72分鐘，呢位52歲教頭企喺場邊投訴緊球證嘅判決，敵軍中場大衛美拿就心急走去界外執波，一手推開企喺度阻住條路嘅柏度，本來先撩人者唔啱，但點知身為領隊嘅柏度竟然一心諗住報復，走向美拿身邊施以「施丹頭槌」怒頂對手個頭，搞到美拿差啲想同佢開拖，最後球證當然將柏度紅牌驅逐上觀眾席。
或面臨整季停賽處分
其實，柏度不嬲個人唔好老脾，過去教韋斯咸時，就試過喺場邊同雲格講手，但襲擊球員就係第一次，而紐卡素會方亦認為柏度嘅行為不可接受，即時罰佢10萬鎊（約130萬港元）。但內部處分都只係小事一樁，相信仲有大把手尾跟，皆因英足總已經搜集晒佢啲罪證，而且仲高度關注呢次嘅球場暴力事件，翻睇完錄影帶後就會有定案，有指佢有可能今季餘下賽事都冇得再喺場邊督師。
舒利亞：應引咎辭職
柏度亦都意識到成件事嘅嚴重性，即刻向外界公開致歉，話自己一時火遮眼先做出呢啲過激行為，無意傷害任何人。不過，好多名宿走出來猛插呢位領隊，包括紐卡素傳奇前鋒舒利亞，佢認為柏度甚至應該就今次犯錯辭職：「我覺得佢仲點可以向佢嘅球員以身作則呢？如果佢主動辭職，我覺得一啲都唔意外囉！」至於侯城領隊布魯士就厚道好多，佢話會接受柏度嘅道歉，但亦都話從來冇見過英領隊會襲擊球員呢啲事。
不過，紐記就話唔會炒柏度，我求大俠亦都覺得罪不至死嘅，而且話晒柏度份約去到2020年夏天先屆滿，炒佢要賠成900萬鎊，試問佢哋個肥佬老細艾殊利點會咁笨呀。
