炒股票就是賭方向，但現時唔止個市，連股份都狂吹無定向風，押注贏面大打折扣。舉個例，上周四博雅互動（434）業績前破頂，「圖表派」自然狂轟亂搶，諗住有盈喜護身，衰極有個譜，點知轉頭升幅一筆勾銷。收市後公佈業績，核心純利僅升三成，數面仲要跌5%，APRU收入又急跌，老闆仲話會搵機會減持。嘩！買咗博業績，真係天堂跌落地獄，結果翌日狂插12%，破頂變雙頂，原來只係一線之差。
近日另一特點，就係熱錢只炒板塊其中一兩隻股，例如中聯重科（1157），跌足3個月後現技術反彈，正常炒家做法，見龍頭股開車，就搵二三線追落後，好自然諗起中國龍工（3339），但結果完全唔work，一格都升唔起。「單獨兩孩」逐步落實，好孩子（1086）炒到啪啪聲，米格（1247）就軟弱無力，青蛙王子（1259）遭沽空機構蹂躪後，初步出咗個「頭肩底」，睇圖似乎買得，而全年業績將成為翻身關鍵。
內房股大弱勢是共識，但中海系旗下中海宏洋（081），去年表現相當平穩，合約銷售額增長27%至172億元，銷售面積164萬平方米，按年增加58%。全年多賺31%至31億銀。現金逆市增至92.7億元，佔市值73%，屬超級現金牛；負債比率亦僅47.8%，財務相當穩健。博上50日線，都有兩成水位。
魏力
http://ww.facebook.com/2012jason