中資投行今年好似特別積極做新股生意，首兩個月喺主板掛牌嘅14間上市公司，接近一半由中資投行擔任保薦人；正在招股嘅內房股陽光100中國（2608），中金就係保薦人之一，此外仲有五間中資投行負責包銷，中資的確陣容鼎盛。
陽光100其實只係集資最多24億元，參與嘅投行數目就有九間，平均除開，每間賣2.66億元，所得佣金明顯係分薄晒。九間投行入面，又要有六間屬於中資背景。
有投行賓架透露，中資投行越來越積極搵新股包銷生意，實行「有單分錢，冇單賺名」，即係搵到芬佬、投資者入飛，就賺取佣金；搵唔到人買，投行個logo落咗喺本招股書度，咁就賺到知名度，同時計入參與新股數目嘅排名。對於上市公司，有多幾間投行幫手賣股，陣容鼎盛，好威水咁，何樂而不為？