徐小鳳大前晚喺紅館開個唱，唱咗首《順流．逆流》，送畀在席嘅前特首董建華同現任特首狼振英，結果全場噓聲不絕，小鳳姐前晚喺個唱尾場重提事件，自爆事後打過畀狼英say sorry，「我問佢（梁）我有冇講錯嘢？對方覆番我話冇」，仲話狼英夫婦聽《順流．逆流》時感動到爭啲喊咗出嚟，然後呼籲全場拍手為佢哋加油。現場今次終於冇再「萬人噓」，梗係啦，狼英同狼太都唔喺度嘛。
可能因為「連累」到狼英「被噓」，小鳳姐不斷隔空「勉勵」對方，話自己初出道時都俾人「藐」㗎；之後盧海鵬扮徐大鳳登場，小鳳姐無厘頭話喎：「點解今日晏晝打畀梁生？就係因為我噚晚講話你（鵬哥）好似長毛呀。」
自認梁粉：個心好難過
之後喺慶功宴上，小鳳姐繼續出力「澄清」﹕「當晚觀眾係拍手、係歡呼聲，唔係噓聲，我做證明，真係為特首歡呼，一唱『不相信未作犧牲，竟先可擁有』，佢就好感動。」
小鳳姐仲直認撐狼：「我係撐佢，我承認係撐佢，不過唔關事，佢個位好難做，我明佢做咗好多嘢，而又冇人認同，個心好難過。」仲堅持當晚觀眾係為狼英佢哋鼓掌，似乎唔想狼英唔開心咁囉。
「梁粉」小鳳姐仲大爆，狼英係佢粉絲嚟㗎﹕「我次次做演唱會，佢未做特首都有嚟。反而今次我冇投佢票（其實上屆特首選舉都係得1,200人有得投票之嘛），佢都嚟支持我，我覺得好大方，因為我唔方便嘛，女人成日唔方便，哈哈哈，又亂講嘢喇！」
李八方
mailto:[email protected]