籃球之神其實應該改名做籃球鞋之神！米高佐敦（MJ）打籃球有幾叻大家都知，但喺波鞋市場更加係唯我獨尊，旗下嘅Air Jordan系列幾乎好似印銀紙咁，一出即清。《福布斯》最新報道就指，2013年MJ單係賣鞋，就賺咗9,000萬美元（約7億港元），而Air Jordan系列嘅營業額，更加係勒邦占士嘅8倍；唔好忘記，LBJ系列已經係現役籃球員No.1，可想而知佐敦呢個品牌幾掂。話時話，MJ最新自傳將於5月6日面世，書名叫做《Michael Jordan The Life》，𠵱家網上已經有得預訂，硬皮版盛惠21.78美金，MJ迷唔好錯過。