講咗足足個幾月，新任世界2姐兼澳網女單冠軍李娜，今日終於大駕光臨香港。三日兩夜行程中會大玩平民化，除咗聽日嘅世界網球日比賽地點會喺平民化嘅將軍澳香港單車館進行外，連入住嘅酒店都喺得4星嘅灣仔世紀香港酒店，娜姐一行4人仲齊齊入住3房1廳嘅大套房，一晚房價5,000蚊有找。
3,000座位全售罄
上個禮拜三（26號）喺國內度過32歲生日嘅娜姐，今日下晝大約4點會同老公姜山等人抵港，準備出戰聽晚嘅世界網球日，同澳洲球手史杜莎一較高下。娜姐對上一次嚟香港打比賽，已經係2011年1月嘅香港網球精英賽，嗰時佢仲未攞法網冠軍，今次真係今時唔同往日，計埋今年初攞嘅澳網，手執兩個大滿貫錦標。聽日場波就靠佢嘅名氣，約3,000座位一早賣晒飛，喺場邊嘅2,500蚊座位仲供不應求，真係唔好睇少娜姐嘅魅力。
不過，大會為咗避免娜姐重演全程黑面1月底返武漢時黑面嘅接機場面，佢一切嘅抵港事宜都完全保密；但有消息指佢今日大約4點從北京到港，然後入住世紀香港酒店；據了解，佢一行4人，包括老公姜山、教練同經理人，會選擇入住大套房，裏面有3間獨立房間，有客廳同廚房，嗰間酒店得兩間呢類大套房，連稅同加一服務，大約5,000蚊一晚，雖然間酒店得4星，但健身室同泳池都齊備。
落老蘭撞貝迪治
同娜姐差唔多時間到港嘅，仲有噚晚仲打緊杜拜網賽男單決賽嘅捷克1哥貝迪治，呢位世界排第6嘅球星第一次嚟香港，仲會帶埋名模女友Ester Satarova一齊嚟，話到明會去蒲老蘭，有興趣嘅粉絲不妨今晚去嗰頭碰碰運氣。
杜拜公開賽可以話係貝迪治嘅福地，已經連續兩年晉身決賽，不過今年對手係前世界1哥費達拿，佢以2:1擊敗衞冕嘅迪祖高域入決賽。