波神你好，我哋係一班普通信徒，每日都背誦住金句「波係圓嘅」嚟面對瞬息萬變嘅球壇。雖然我哋都相信你愛我哋，正如神愛世人一樣；但係凡人始終係凡人，我哋每個球迷身上都總係孭住幾宗罪，面目可憎。
第一宗罪：貪。球壇裏人人都係貪心鬼，入一球望第二球，贏一場望贏兩場；有隊護級分子最近連贏4場之後，貪得無厭話要破紀錄贏多場，以為自己係Big 4，其實你只係A貨。
第二宗罪，懶。要做一個有話語權嘅球迷，路見不平開口就「抦」，本身係一個平衡心理嘅好方法；之但係鬧還鬧，一定唔可以懶。好似上周中曼迷循例鬧爆莫耶斯之際，其中竟然有一堆盲迷話唔明點解唔出桑馬達，話莫耶斯廢㗎！嗱，廢還廢，但若果你唔知乜嘢係cup-tied就大聲夾惡，俾人笑嘅係你自己。
第三宗罪，怒。發嬲係球迷普遍嘅共同特點，唔妥咪鬧囉！之不過鬧完又點呢？球證會睬你咩？教練會理你咩？球員會怕你咩？而當你一鬧上腦，場面就會好粗鄙，粗口橫飛亦係父母們唔畀小球迷入場嘅原因，搞到個場雜晒囉。不過，人外有人，伯明翰球迷最近竟然入鄉隨俗，喺球場掛咗支有香港粗口嘅橫額；若果電視鏡頭影到，唔知使唔使打格仔呢？
第四宗罪，妒。呢項真係冇得解釋，過來人都一定試過咁諗；正所謂老婆硬係人哋嗰個正，球員硬係隔籬嗰隊勁，老闆硬係隔籬嗰個有錢，自己就係最懷才不遇，直到人哋破產先安樂。
第五宗罪，驕。足球之神其實都幾公平，呢宗罪係特別炮製畀所謂強隊嘅。上屆曼城喺足總盃決賽衰咗一次畀韋根，今晚對住新特蘭，再滑鐵盧嘅話，肯定都係因為呢個字：囂。
第六宗罪，色。球員鹹濕就出晒名㗎啦，查實球迷們（包括AV仁哥？）亦喺傳媒們寵壞之下，對球員們嘅另一半瞭如指掌；甚至場波悶嘅時候，都會搵啲相睇吓㖭，對比賽非常唔尊重囉！
第七宗罪，寒。孤寒，可能係7宗罪入面罪名最輕嘅，分分鐘好聽起嚟叫做節儉㖭。球迷們最孤寒嘅，唔係唔畀月費但上網求link，而係對於愛隊以外嘅球隊有彈冇讚。得閒欣賞吓人、抽少啲水，日後你俾人抽水嘅機會都少啲……這是波神的話。
KEYMAN
now TV主持