【灣仔】與李思捷傳過「姊弟戀」的陳雅倫（Ellen）前晚在灣仔舉行生日會，補祝上月16日48歲生日，好友羅霖、張文慈、陳德森、錢國偉及寇鴻萍夫婦等到賀，緋聞男友李思捷也有出現。
前晚10時許，性感低胸的Ellen蹺住李思捷到場，Ellen揚言一定會不醉無歸，其後又風騷指住思捷說：「呢個好兄弟，佢好有風度，驚我醉嚟睇住我，我年年都不醉無歸。」問李思捷有否送禮物給陳雅倫？他表示有，是好特別的東西，此時Ellen即風騷摸一摸思捷的臉笑說：「你個樣好衰。」思捷笑謂：「好衰咩？」二人打情罵俏後便入場。
高呼老公
陳雅倫在派對內滿場飛，但早已喝醉，不停攬住好友影合照和碰杯，全程high爆。切蛋糕時，Ellen即刻叫思捷站在身邊，對思捷投懷送抱，Ellen除捉住思捷臉貼臉外，又風騷請他食「波餅」攬到實，見思捷亦十分受落。
不過穿上吊帶裙的Ellen就相當危險，幾乎走光露點，幸得思捷在她身邊傍實照顧。至於思捷整晚如男主人般陪住壽星女，有醉意的Ellen不時高呼思捷做「老公」和「男朋友」，又介紹他給身邊朋友認識，十分錫住對方。不過思捷於凌晨1時許先行離開，未有陪她玩天光。
採訪：張晴
攝影：黃文偉
