早排「山楂女」以為可以靠拍拖新聞嚟幫助提升人氣，所以係咁同記者放料，但因為放到過晒龍，結果搞到「波牛」身邊嘅長輩都好唔鍾意佢，仲要波牛唔好再俾人利用，快啲斬纜。
激嬲老細
最後佢哋兩個分咗手，不過山楂女之前高調成咁，梗係覺得好冇面啦！所以呢輪都唔想見人，連工都唔想返，所以佢向公司請假話要休假，咁人哋咪搵替工代佢囉，點知到人哋話搵到人代佢，佢又話可以返工，叫老細推咗嗰個替工，點知老細鬧爆佢，話佢當公司係冇掩雞籠，一時又話要休假，一時又話要返工，所以老細叫佢唔使返啦，叫佢放心休假。同佢拍檔嘅同事一向都不滿佢成日巴巴閉，目中無人，監製都嫌佢煩，其實佢哋都寧願佢一去不復返，然後休吓休吓，就索性搵人代咗佢算數。
撰文：關仁