二月二十三日，大編輯大記者及成班老友一齊去中環遊行，為新聞自由發聲，夠晒大陣仗，左丁山表示支持，但佢兩個問：「你去唔去遊行？」咁辛苦，唔去咯，坐在馬場廂房睇香港金盃賽，食拖羅、白灼中蝦（一隻咁多，唔敢多吃），豈不舒服！
佢地問左丁山對李慧玲事件嘅立場，表個態。表態就表態啦，第一：商營電台講到尾都係為咗賺錢嘅啫，2004年鄭大班紅透半邊天，最高收聽率曾創下四十五萬位聽眾嘅歷史新高（恐怕亦係空前絕後嘅紀錄），極之叫座，在廣告方面，多到爆燈，鄭大班親口講過，佢嘅節目每年廣告收入過億元。如此節目直情係電台搖錢樹，資本家應該與佢簽高薪長約，綁住鄭大班先至合乎經濟道理，但電台炒咗佢噃，寧願犧牲巨大廣告收益及巨大輿論影響力，為乜原因呀？嗱嗱嗱，資本家嫌錢腥，唔係見錢開眼之時，就一定係有政治考慮嘅啦，炒鄭大班，取消皇牌節目「風波裏的茶杯」，仲唔係百分之一百政治性，而且同時又炒埋黃毓民㖭！
呢日在馬場廂房行去買飛之時，被人在後面喝住，回頭一望，就係黃毓民大佬，佢話劉皇發請佢喎。見到毓民，就諗起佢批評李慧玲之言，所以有第二點：自大班離開後，根本冇人係大班嗰皮，佢留下之空檔不停換主持人，最後由陳志雲換埋李慧玲，但節目已完全失去「風波」嘅聲勢，收聽率距離鄭大班好遠，廣告亦隨之下滑，呢一點，如果大家聽過節目，心裏有數啦。故此電台呢次炒李慧玲，絕不能與炒大班相比，其中嘅政治性、商業性理由糾纏不清。到目前為止左丁山睇過分析李慧玲事件文章之中，最深刻一篇就係王慧麟博士發表於二月二十三日《明報》之長文：「假的假不了」，王博士講1955年何佐芝寫信俾輔政司申請成立一家商業電台，十分有啟發性，不可不讀。
交稿之後，發生前明報總編輯劉進圖在鯉景灣被斬六刀事件，iPhone內之WhatsApp立即響個不停，傳媒界朋友極表憤怒、遺憾、震驚，於是今日星期日又有多一次傳媒人大遊行，以示捍衞新聞自由及免於恐懼的自由。兇徒傷人，手段兇殘，斬腿部神經綫快狠準，睇嚟目的不是攞命而係要劉進圖殘廢一生，其心可誅，幕後買手會受天譴。劉君嘅私人生活低調、簡樸，好難想像此事與私人恩怨有關，如真的是為了公事，香港恐怖了。