周六有場76人主場對巫師嘅比賽，就咁聽戲碼唔算太吸引，不過主隊半場就有個儀式，成為那些年球迷嘅焦點，咪就係艾華遜（AI）高掛3號球衣囉。
呢位名將贏過常規賽MVP，攞過得分王，更憑打落門牙和血吞打法，贏得「不死戰神」外號；01年帶領76人殺入總決賽，更加係生涯高峯！今次高掛球衣儀式有唔少名宿出席，包括同樣打過76人嘅Dr.J艾榮、摩西斯馬龍、莫湯保等；當日比賽嘅主隊球員，球衣更會印上「Allen Iverson Sixer Forever」嘅章（小圖），以表揚「不死戰神」貢獻。
雖然退休後傳出破產，多次想復出又無人問津，不過AI霸氣不減，佢嘅恩師布朗日前透露，上個月同愛徒見過面，家中嘅細路都好興奮。布朗話最難忘嘅一幕，係當小朋友問AI邊個係史上最偉大球員，佢毫不猶疑就話係自己。AI之後補充，話咁講唔係對MJ或者Dr. J不敬，不過以咁嘅身形，如果唔相信自己，肯定冇當日嘅成就。無論如何，身高不過6呎，但可以喺巨人之間動輒入4、50分，AI絕對係唔少球迷嘅英雄。
