李思欣自04年處女參演無綫劇集《赤沙印記@四葉草.2》入行，一做便九年，還有三個月便約滿。思欣有感無綫待遇奀，發展機會不多，近日思前想後決定不續約。她昨日忽在facebook吐苦水，大呻遭無綫藝員科來電揶揄，冷嘲熱諷，故認定離開沒錯，更叠埋心水剩餘日子要直入雪櫃。
思欣在fb留言：「我加入無綫九年，本來有點不捨得，剛收到藝員科電話，證明離開是對的，謝謝。」思欣是否接藝員科打來要提前解約？她昨在電話中說：「唔係，內容大致係佢哋睇到報章指我打算唔續約，佢哋話到我5月31日約滿為止，會計埋啲嘢畀我。我最初以為我係藝員約，騷又完晒，可以提前解，但佢哋話仲有兩、三個月都好快過，出面都好嘅，原來佢哋真係好有誠意，我都信出面應該係好嘅。」
預計被雪三個月
被冷嘲熱諷，問到思欣可覺心淡，她失望地說：「有少少，或者佢哋係間大公司。我入行就加入無綫，𠵱家感覺似離開屋企，但阿媽留都唔留，既然佢都話出面好，我都相信要出去闖吓。」思欣已預計未來三個月被雪藏，她無奈說：「坦白講，佢都唔會畀嘢我做，但我都尊重合約精神，做好先走。」思欣慶幸仍可登台賺外快：「我會靠自己，仲有錢開飯，即使有老公（范振鋒）養，都唔可以長期攤大手板。」
思欣無悔離開的決定：「始終出面好多電視台，又有內地經理人想同我傾。」香港電視、有線和nowTV加入免費電視行列，三台籌備得如火如荼，思欣表示會考慮合作，她又說：「老公尊重我決定，佢好支持。不過我𠵱家始終有家庭，唔諗住長期留喺內地，拍劇係可考慮。」
採訪：比華利
場地：嵐喬日本料理
