【本報訊】長和系主席李嘉誠前年公佈分身家計劃，市值逾千億元的上市王國將交予長子李澤鉅掌管。李嘉誠昨日澄清自己未正式交棒，因世界「唔係你哋諗咁安定」，長遠來看有很多值得擔心的地方，故目前完全無打算退休。他對被指「撤資」仍耿耿於懷，昨多次在無人提問下，他亦主動回應「做生意有買有賣唔稀奇」。
記者：孔雪茵 石永樂
闊別股東會及中期業績記者會近一年，李嘉誠昨首次於業績記者會露面。被問到現時長和系由他抑或長子話事，李嘉誠飛快回答：「我𠵱家都未話交畀Victor（李澤鉅洋名）。」
李嘉誠指出，李澤鉅現時參與集團每件事，亦與他一同出席每個會議，「如果今日我決定交棒，然後去旅行，絕對冇問題」。不肯退休，是憂慮目前世界的形勢，「好多嘢諗長啲就好多擔心」。但李嘉誠未明言擔心何事，「未必百分一百準，引帶你哋錯誤又唔好啦」。
對於接棒後的發展藍圖，李澤鉅昨未有多談及，只稱公司最近成立一個執行委員會，「公司傳統唔會因一個人而改變」，又指自己對股東最重要責任是有成績，「有項目再去講，如果一早講咗，競爭對手咪睇到，都唔可以急」。
指身家曾被低估一半
在分身家計劃中，幼子李澤楷可獲父親資助開拓業務。李嘉誠昨透露過去一年多向幼子支付20億美元（約156億港元），並投資於香港。「如果我喺香港賣20億美元資產，就會係宗大新聞」。
最近有外國傳媒擺烏龍，多計銀娛（027）主席呂志和身家，並爬過李嘉誠做首富，後來又澄清李才是本港首富。
講到富貴榜排名，李嘉誠表示自己不承認也不重視「首富」之名。但隨即又指外國雜誌10年前將他身家低估一半，「最好佢寫我少啲，你寫我多啲有乜用呢」？他又指，人生的意義在於能否獲得人欽佩，「做人不能自私，人生條路係衣食足後，能夠服務你唔識嘅人」。
此外，儘管昨日未有傳媒問撤資，但李嘉誠一聽到與投資相關問題，都當「撤資」回應，認為香港有人造謠他「撤資」。他指做生意互通有無，自古已有，又指自己過去在外國賣產賺千億、百億元，都未曾被批評撤資。
今年分拆港燈（2638）套現500億元現金，又打算分拆屈臣氏，坐擁巨額現金下，李嘉誠指投資機會多，「你畀我1,000億美元，真係好短時間可以去投資」，希望向股東負責，找到好項目。
李嘉誠又慶幸30年前開始海外投資，「如果唔係我今日無咁樣」。
投資新科技七成賺錢
另一方面，李嘉誠近年以私人公司「維港投資」染指新科技，他指這僅是投資，不涉及經營，亦無意將「維港」上市。
講到維港戰績，李嘉誠喜上眉梢：「並唔係投資10件全部都成功，但都有7件成功……算係好離奇」。他以facebook（fb）做成功例子，入股時公司仍蝕錢，又未上市，但因為fb讓3G無條件使用，有利和黃（013）業務，「後來賺錢，就靠你最初個動機好」。
【李嘉誠昨日金句】
「我唔承認首富喎，10年前外國雜誌話我有幾多財產，相信估少咗一半。」
「並唔係投資10件全部都成功，但都有7件成功……算係好離奇。」
【花 絮】
政治問題冇say no
李嘉誠近一年冇公開見傳媒，噚日心情靚到爆，連平時唔多答嘅政治問題都冇say no，只係答到劉進圖受襲時，都要瞄下張「貓紙」嚟答。他解釋舊年5月因割膽石誤傷聲帶，先唔見記者。但本報早前獲消息，記者會係星期一先拍板。
試食植物蛋嫌火太猛
超人私人嘅維港投資入股植物蛋公司Hampton Creek，同時獻出佢嘅第一次，首次入廚房試植物蛋，咁味道如何呢，超人冇直接講，只係話「佢cook個蛋，火太猛，油太滾……將來一定好食」！
李澤鉅低頭睇iPad
超人李嘉誠噚日係全場焦點，旁邊嘅李澤鉅同霍建寧都係做聽眾為主，見到李澤鉅全場睇住部iPad，佢係睇緊即時新聞，仲大讚即時新聞效率高。
