醜婦終須見家翁！日本比特幣交易平台Mt.Gox終於爆煲，有海外苦主搭飛機到日本追討賠償，但攞返錢嘅機會，應該低過阿爺批准特首選舉有公民提名。呢個故事又再提醒大家，喺缺乏投資保障嘅地方做買賣，要有心理準備隨時被「走數」。
話說Mt.Gox喺2月7日，以交易系統有事為由，突然暫停客戶提款，之後解話，就歸咎同業之間嘅交易驗證軟件有漏洞，所以要暫停提款服務，以免壞人有機可乘。但奇就奇在得佢間公司話有事，其他同業運作大致正常，行政總裁卡佩萊斯禮拜日仲辭埋行業基金會個董事職銜（應該係被辭退），結果公司翌日就關門大吉。
最惹人非議，係Mt.Gox至今冇明確交代發生乜事，反而網上就流傳一份疑似內部文件，指公司呢幾年俾黑客撻咗70幾萬個Bitcoin都唔知，發覺損失數億美元，瀕臨破產，家陣搞緊重組云云。
事發之後，表現一直閃縮嘅行政總裁卡佩萊斯，周三發聲明澄清冇着草，仲喺日本諗緊辦法救亡，但拒絕披露停業底蘊。隨着事件不斷發酵，雖然美國和日本政府已介入調查，但睇番Mt.Gox故弄玄虛嘅回應，今次爆煲不外乎兩個可能，第一個係佢真係俾黑客造世界，唔見晒客戶啲比特幣，第二個係佢造啲客嘅世界，穿櫃桶底。你選擇做天真派還是理智派？
點都好，今次Mt.Gox爆煲凸顯虛擬貨幣缺乏監管、出事時難討回公道之餘，亦反映比特幣要取代各國貨幣成為主流蚊年，相差何止八千里路雲和月。
走勢波動難成主流貨幣
事實上，撇開Mt.Gox呢類疑似詐騙，單係比特幣嘅波動走勢，就好難成為主流貨幣，事關讀書嗰陣都有教，貨幣最重要嘅用途係減低交易費用，如果連本身個價都唔穩定，就好難有作為。
無巧不成話，舊年金價冧檔跌近三成，加上中國大媽年尾見獵心喜，為比特幣瘋潮如虎添翼，創造年升百倍神話，但自從阿爺去年11月出手打壓後，比特幣同黃金嘅走勢對調，前者噚日得番500幾美元，較年初唔見一半。
相反，多得中國大媽一直鼎力支持，加上投資者翻啅，金市今年表現閃令令，唔聲唔聲已上番每盎斯1,330美元，今年累升約10%，成為市場奇葩。
沽日圓較揸金值博
不過，正如股神畢菲特話齋，揸金冇息收兼缺乏實際用途，長線回報難及股票等資產。從走勢上，金市短期應該有餘未盡，況且而家烏克蘭政局未穩之餘，噚日又傳北韓試射導彈，地緣政治因素對後市有利，短期要重上1,400美元非難事，但高追可能不智，伺機沽日圓可能仲筍。
奇兵
本欄逢周五刊登