【本報訊】蒙頭持刀獨行賊，凌晨闖入九龍塘又一村豪宅，打劫屋中姊妹，掠去總值近七萬元財物。其間獨行賊全程不斷與姊妹攀談。疑匪於一個月後落網，事主一度無法在認人手續中認出疑匪，改為要求疑匪及八個戲子複述賊人案發時說過的兩句話，立即成功憑聲認出疑匪，猶如電影《食神》情節。
記者：楊家樂
涉案56歲被告陳秉文，昨否認搶劫及盜竊四罪受審。遇劫陳氏姊妹年約30歲，居於九龍塘又一村三層高獨立屋。
任職柔道教練的姊姊陳穎欣供稱，去年9月11日凌晨她正在睡覺，矇矓間一名男子手持電筒及菜刀走進睡房謂：「我嚟求財嘅，將屋企值錢嘢攞晒出嚟，我唔會傷害你。」她遂將總值15,000元首飾及現金交給該男子，又奉上提款卡及密碼，並按指示陪同男子到鄰房弄醒其妹。
任職舞台劇導演及演員的妹妹陳穎思供稱，姊姊入房對她說：「冷靜啲，我哋俾人打劫。攞晒啲值錢嘢出嚟。」男子則謂：「唔使驚，我唔會傷害你哋嘅。」又要求她交出提款卡。
陳妹指要到其他房間提取，男子遂要求妹排最前，姊在中間，自己殿後。陳妹問男子：「係咪唔望你呀？」男子讚謂：「阿妹就醒好多，態度合作好多。」由於陳妹遊走各層找財物，男子一度質疑：「你啲嘢唔係放自己房咩？」行走期間又問：「你哋啱啱搬嚟㗎？咁多嘢嘅？」
男子取得陳妹提款卡後，要求陳妹寫下密碼，未待她寫完便謂：「同你家姐個密碼一樣嘅？」陳妹沒好氣地答：「係呀，呃你就唔會一樣啦。」
男子自稱同黨在屋外等候，成功提款後才會離去，要求兩姊妹先就寢，謂：「好啦，冇事喇，𠵱家瞓覺啦，咪埋眼，一覺瞓到天光，咁就乜事都冇發生過。」其間不斷與兩姊妹對話，又問她們通常何時起床，得悉大約早上8至9時後便謂：「咁早起身做乜呀？」陳妹只好答：「都唔算早啦。」
法官笑謂「絕無冷場」
陳姊其後着男子盡快離去，男子再次發表偉論：「你使乜咁驚啫？我要傷害你哋嘅，一早就傷害咗啦。我對你哋都算仁慈啦，人哋嗰啲一入嚟就五花大綁，我𠵱家都俾你哋瞓響度啦。」
兩姊妹最後同意睡覺，男子說：「咁𠵱家咪幾好，兩姊妹幾溫馨吖。」說完便離開睡房。數分鐘後陳妹發現男子已走，醒覺他是單獨行事，即報警求助。控方指被告案發後即日離港，事主戶口共被提取四萬元。
法官林嘉欣聽過案情，笑謂疑犯一邊打劫一邊不停說話，「戲劇術語嚟講，就係絕無冷場」。
案件編號：DCCC1141/13