期指結算日，港股怒挾390點，突破12月以來下降軌，成交亦算配合，可說暫時脫險。
美國電動車龍頭Tesla獲大摩上調目標價，預測PE成140倍，就係呢個泡沬價，加上兩會前炒環保概念，帶動沉寂多時嘅電池股狂升，食得最應的股份應係天能動力（819），而盈警因素已大致反映，可追落後，不妨小注博兩棍上升。
上日推介的漢傳媒（491）果然一去絕塵，最多爆升四成，午後現震倉，收0.111元，急漲17%，市值僅1.7億，波動難免，跟炒最緊要細注，量不用多，博升幅已足夠。
信義玻璃（868）去年業績相當靚仔，股價於6蚊營造「雙底」後，目前已企穩250日線，並以W形底再展升浪，順風車之門經已打開！信玻去年純利35.2億銀，按年增長197%，全年派息激增80%，仲未計實物分派信義光能（968）。
摩通最新報告睇10蚊，水位46%，認為國產4G機興起，集團手機屏幕玻璃生產線去年投產，將成今年盈利寶藏。現價根本未反映此因素，加上光伏業務有強勁盈利，而今年預測PE僅11倍，趁第二季需求高𥧌期前買入，相當值博。
魏力
http://www.facebook.com/2012jason