屬馬嘅醫管局前主席胡定旭接受馬會新出刊物《駿步人生》訪問時透露下任特首心水人選，佢自稱「何德何能」做特首，斷言無意加入政府，最想「有才有德嘅人」走出嚟帶領香港。至於邊位係「才德之士」？佢冇講，但就話不論沈祖堯、馬時亨或梁錦松選特首，佢都樂意幫佢哋寫競選宣言，甚至出任競選辦主任。總之心水唔係CY囉。肥胡話馬年願望係減肥，話太太同個女都唔飲酒，所以早前過節同家人聚會時「禁酒」，因為飲少咗酒，清減咗三磅，要繼續努力。近來中港矛盾劇烈，雙非童等問題引起好大爭議，肥胡話自己係第一代雙非子女，好彩喺香港大，接受西方教育先有今日，希望大家多多包容。