越來越多富二、三代浮面。星島集團（1105）噚日宣佈，主席何柱國33歲嘅兒子何正德（Kent）即日起由非執行董事轉做執行董事，主要負責拓展數碼媒體業務。
何正德最為人所熟識，就係佢同「娛樂大亨」林建岳位靚千金林恬兒（Emily）拍拖，最近仲有傳聞指二人已經喺外地註冊結婚。
講番何正德，佢喺美國杜克大學修讀經濟學，仲持有史丹福大學工商管理碩士學位，喺美國高盛、三藩市星島報業工作過，現為矽谷私募投資公司Harbor Pacific Capital首席合夥人。
星島舊年已經話計劃發展互聯網同流動媒體業務，前行政總裁盧永雄10月起只做執董，以個人名義跟星島成立合資公司發展呢項新業務。何正德𠵱家轉做執董兼負責數碼媒體，似乎係跟盧永雄合作喎。