禹銘（現稱新工投資，666）前董事總經理馮耀輝財技一流，亦精於投資古董，係中國古董收藏家。
2011年佢借出過百件明清家具、西洋粉盒畀北京故宮博物院做展覽，因部份展品被盜而成為大新聞。過去一段時間，佢積極籌備私人博物館「兩依藏」，呢個博物館今日正式開張。
兩依藏係以馮耀輝兩位女兒馮依琪同馮依凌嘅名字命名，馮依凌仲係館長。呢個博物館位於上環荷李活道，即係好多古董店嗰條街，佔地2萬平方呎。根據網頁資料，入場費200元，而且需要預約。
據講，兩依藏主要收藏中國明清古董家具，大部份以黃花梨同紫檀等珍罕木材製造，藏品數目超過300件，亦會展出來自1880年代至1960年代歐洲嘅珠寶手袋同華麗化妝盒。