【星狂熱之以毒攻毒】係唔係覺得好失落？個心好似若有所失呢？有統計過自己為咗煲韓劇《來自星星的你》喊濕咗幾多包紙巾嗎？𠵱家《星星》終於完結啦，係唔係覺得煲劇心癮仍然難戒，好想快啲搵個新目標嚟慰藉心靈空虛。其實方法好簡單，就係玩花心，因為韓國實在有太多電視台，每星期都有大量貨源供應，完全唔使擔心冇韓劇睇，好似近期有三齣劇喺韓國嘅話題度同《星星》都有得揮，保證周一至周日都有嘢煲。
撰文：施洛冰
《急診男女》懵智大放笑彈
逢周五、六播出
收費台tvN嘅新劇《急診男女》今晚會播出第10集，呢齣劇喺香港都好受歡迎，話題性同《星星》有得揮，因為主演嘅女主角係《Running Man》嘅宋智孝，仲有《繼承者們》做李敏鎬大佬嘅崔振赫，睇個牌面都好吸引。雖然宋智孝喺劇中做失婚婦人，幾經辛苦去咗醫院做實習醫生，點知又撞返前夫崔振赫，呢對過氣夫婦喺相處過程中，似乎都對大家未忘情，呢啲橋韓劇粉必like，加上懵智喺劇中成日烏烏龍龍，又唔顧索女形象，不修邊幅，真係笑料百出。
《奇皇后》河知雲工心計
逢周一、二播出
河知雲之前同玄彬嗰齣《秘密花園》，有收視有口碑，今次佢又擔正做《奇皇后》，喺韓國收視都好犀利，由於韓國古裝劇一向受歡迎，加上呢啲宮廷式嘅明爭暗鬥，真係好有劇味，所以有一班捧場客支持，特別係鍾意煲長劇嘅粉絲亦唔可以錯過，𠵱家呢齣劇已經播到第33集，係劇情亦越來越緊湊，難怪收視越嚟越高，亦都係想挑戰睇長劇嘅入手之作。
《Three Days》朴有天唔錫身
3月5日起逢周三、四播出
呢齣劇未開播已經備受關注，原因好簡單，因為佢將會接《星星》檔播映，所以必定有一班捧場客，好似《星星》之前都因為接《繼承者們》棒，所以收視一直高開，而且《Three Days》男主角朴有天之前幾齣韓劇都勁受歡迎，好似《成均館緋聞》同《屋塔房王世子》都深得韓劇粉鍾意，今次佢轉形象做總統警衞員，仲要有唔少動作戲，之前佢拍戲拍到肩膀韌帶拉傷，雖然醫生話要佢休息3個月，不過為咗個劇佢都死頂，咁鬼專業點都要加番啲同情分。
【其餘7大精選】
《別有用心的單身女》
逢周三、四播出
李敏貞嫁畀李秉憲之後嘅復出作，仲要扮失婚婦人，夠晒吸引。
《百年新娘》
逢周六、日播出
人氣組合FT Island成員李弘基主演嘅新劇播咗冇耐，已經成為熱門搜索詞。
《真是好時節》
逢周六、日播出
上周首播收視已經衝破30%，金喜善扮爽朗女子真係吸到唔少觀眾。
《神的禮物——14天》
3月3日起逢周一、二播出
李寶英擔正嘅懸疑查案劇玩埋穿越時空，有晒噱頭。
《看見鬼的刑警處容》
逢周日播出
吳智昊主演嘅呢齣鬼劇，格式似足美劇，應該有唔少美劇粉絲會追埋一份。
《需要浪漫2014》
逢周一、二播出
第三季都仲咁有叫座力，金素妍同盛駿主演，仲有兩集就完，可以一口氣煲晒。
《感激時代》
逢周三、四播出
由金賢重孭重飛嘅《感激時代》，應該係最有機會搶《星星》客嘅劇。
