天行國際（993）及第一天然（1076）在上年9月開始，股價一枝箭般飆升咗7倍。而場內的太平洋實業（767，下稱太實），正正揸咗呢兩家股份，太實肥仔水。而呢期太實先起嚟異動，聞到飯香，撲炒太實。
太實揸咗天行627.5萬股，又啱啱喺12月，買入第一天然1,700萬股，每股4.5元。
第一隻天行，由上年9月尾3蚊起步，到家陣近24蚊，升咗6.8倍，太實來自天行呢期升幅嘅增值，講緊1.3億銀。後邊第一天然，啱啱前個禮拜，撻行副偈，係咁意翻咗一番，又為太實增值半億銀。兩股暫時為太實增值，講緊高達1.8億銀，接近太實40%市值。
又第一天然啱啱發公告話，同有關生態旅遊、娛樂博彩業務人士接洽。若果呢壇係大製作，第一天然股價繼續有表現，太實家底，keep住肥仔。
太實就算連埋上年10月1供2，以及送紅股攤薄因素，NAV仍高達0.34元，計埋天行及第一天然每股增值6.5仙，太實NAV上到0.4元，現價（0.168元）折讓達到58%，PB得0.43倍。
博重上0.255元高位
場內同太實同樣主打財仔業務嘅靄華押業（1319）1.8倍PB、香港信貸（1273）1.1倍，太實平咁截。
再講，太實成間公司市值得4.7億銀，大股東又揸咗近六成權益，街貨市值得1.9億銀，若果真係玩變身，要湊大，容乜易？
又太實上星期二，成交9.6億股，幾乎等於街貨股數（11億股），夠晒鑊氣，快炒博上返上年10月高位0.255元，太實要翻半番，到時，集團PB只得0.6倍，亦未有耐追到行家。
錢雋
細價股專家
本欄逢周二、五刊出