白鴿黨何俊仁爆出開會期間用iPad睇女後，噚日未見現身立法會，一眾議員就對事件議論紛紛，鼠王芬仲講到好驚訝咁款，唔通日後為怕被睇蝕，會對鐵頭仁避之則吉？
鼠王芬噚日話睇女相事發後收到十幾封「市民」來信投訴鐵頭仁，包括前下屬李偲嫣，覺得今次事件嚴重性在於鐵頭仁「不嬲唔係sell呢個image」，所以影響咗佢對鐵頭仁嘅觀感，「平時覺得佢好嚴肅，𠵱家會覺得點解佢咁都得？」雖然講起鐵頭仁好似驚到要「彈開」咁，但鼠王芬話以後開會唔會因此着得密實啲嘅。
民建聯李慧琼見到記者㩒手機，抽水問「你睇緊乜嘢圖呀？」話相信市民會懲罰白鴿黨，同時慨嘆話「我哋作為女仔，當然覺得特別難接受」。
前日坐喺鐵頭仁左手邊同佢傾過偈嘅工黨何秀蘭，就話一直唔知鐵頭仁睇緊乜嘢，笑指日後為免尷尬，「以後我望過去時會小心啲，會講我望過嚟嘞，畀三秒鐘通知先」。
前日曾擰轉頭告知鐵頭仁香港發生「大單嘢（指劉進圖遇襲）」嘅黨友黃碧雲，就話仁哥當時表情「好似好surprise咁」，點知鐵頭仁睇女會成為另一「大單嘢」男主角。
建制男高調「戒色」
民建聯男丁不論老少噚日突然高調宣示「戒色」立場。早排先喺旺角大派安全套、30幾歲嘅陳恒鑌聲稱，「私下都好少睇嗰啲嘢」。65歲黃定光就滿腹疑團，「我同佢（何）都60幾歲人，我都奇怪，點解佢對呢啲嘢（女模特兒）有興趣？」自稱「年紀大，機器壞」，只對軍事同歷史故事有興趣喎。
社民連長毛就覺得事件無乜大不了，認為大家唔使大驚小怪，仲話平日建制派一係唔嚟開會、一係開會時瞓覺，同今次事件無乜大分別，「佢（何）係要對佢嘅選民負責箒」。
mailto:[email protected]