唔使同老公備案
噚日喺九展舉行「第三十八屆香港國際電影節」記者會，《香港仔》同埋《那夜凌晨，我坐上了旺角開往大埔的紅VAN》做開幕電影，閉幕電影係林超賢嘅《魔警》，噚日兩部戲嘅演員，《香》片嘅楊千嬅、GiGi、古天樂，《那》片嘅徐天佑、黃又南及李璨琛都有出席，古天樂仲做埋電影節大使。GiGi被問老公有冇睇過佢啲劇照？佢話：「睇晒啦。」古仔笑話：「你老公梗係睇晒啦……啲劇照。」GiGi笑話：「佢睇咗冇乜特別反應。」古仔整蠱GiGi話：「睇晒都冇特別反應？」GiGi話：「講清楚啲，係睇晒劇照。」古仔好搞笑話最好將來嘅老婆都要咁犀利，佢哋又預告戲中有幾激嘅床上親熱，Gigi話唔使同老公備案。楊千嬅都話喺《香》片嘅情緒好sad，返屋企都唔想同老公講太多嘢，自己都驚驚哋。