任天堂經典遊戲「孖寶兄弟」陪住好多機迷成長，佢哋嘅紅白機同N64當年好受歡迎，好多機迷都想重溫。以香港為基地嘅對沖基金Oasis Management Co.，日前就去信任天堂社長岩田聰，要求盡快推出任天堂App，等手機用家可隨時隨地透過蘋果iOS同Android等智能產品打機之餘，亦能為公司帶來收入，一家便宜兩家着。
作為任天堂股東之一，Oasis對任天堂一直拒絕進軍手遊市場感到不悅，投資總監Seth Fischer舊年中已去信岩田聰，叫佢快手進軍流動裝置市場，可惜任天堂食古不化，擔心通過第三方平台出遊戲會令公司得不償失，一直拒絕。Fischer再發功，話任天堂要緊貼客戶喜好同需要，公司擁有龐大電玩收藏庫，應加以利用至啱。
可惜，岩田聰唔認為智能手機將電玩推到盡頭，又話出隻遊戲App唔簡單，機迷要繼續等了。