期指結算日，舊年三大藍籌股王──騰訊（700）、銀娛（027）、金沙（1928）齊齊發威，帶動恒指升近400點，重上22800水平，但其餘平時熱炒嘅科網及濠賭股，明顯跟唔上，挾淡倉味道極濃，炒開二三線股嘅戰友，未必能夠享受噚日嘅升市。
唯一嘅好兆頭係，券商點石成金威力猶在，富智康（2038）、信義光能（968）獲大行唱好，分別爆升13%及21%，反映依然有熱錢覓食。
財爺提出搞未來基金，應付人口老化問題，其實相關問題在內地同樣嚴重，主打老人藥嘅石藥集團（1093），有賣點！石藥旗艦藥品包括治療中風嘅「恩必普」、改善老人癡呆嘅「歐來寧」、控制高血壓嘅「玄寧」等，全部針對老人常見疾病，需求不愁問題。集團管理層早前接受訪問，講明要把專利藥做多做大，旗下在研發新藥項目多達170項目，盈利增長有保證。首9個盈利按年增長79%，勢頭強勁。
講催化劑，石藥今日收市後將正式升呢做MSCI中國指數成份股，早前里昂發表報告指，基金在指數生效前要掃入逾20億銀貨，以石藥每日平均成交約1億銀計，基金今日肯定掃貨掃到甩轆；無論從中或短線角度出發，都極具投資價值。
唐牛