衷心祝願劉進圖早日康復。當時我一邊睇直播財政預算案，財爺開腔不久，屏幕忽然碌出一段文字，話《明報》前總編劉進圖遇襲，立即致電傳媒友人收風，當知道佢情況嚴重搶救中，心頭好似壓住一嚿大石，好辛苦。
已經唔係憤怒咁簡單。我先問自己，呢度仲係咪香港？再問，下一個會係邊個？我替身邊一個一個堅守崗位之傳媒朋友憂慮，香港，竟然無法無天到如此地步，三日前大家正因李慧玲被商台粗暴解僱，劉進圖調職空降馬拉老總，《蘋果》、《am730》被抽廣告，被迫上街捍衞香港言論自由核心價值之際，言猶在耳，就發生粗暴一百倍之光天化日當街行兇，幕後黑手擺到明要挑戰香港人，你話保衞新聞自由咩？我就偏用針對傳媒高層暴力襲擊「教訓」你班香港人，睇你哋有幾惡，仲敢唔敢寫。
本地傳媒人莫不心寒
政府官員唔敢承認同新聞自由有關，擺到明詐睇唔到，十分可恥，尤其可恥是認識劉進圖多年兼傳媒同行出身之運房局副局長邱誠武。
幕後黑手可以係政治勢力，亦可以係黑勢力，或任何不滿劉進圖管理下《明報》報道嘅人士，呢種要攞命嘅做法，唔單止係對《明報》言論不滿，而係似要警告香港人，所以先用到當街斬人方式。
而亦因為遇襲者係劉進圖，也有唔同影響，佢乃八十年代由基本法起草而做新聞嘅資深傳媒人典型，有睇法，亦同各政界人士有私交，劉對本地政界及傳媒界有影響力。
呢類傳媒人，仍在編輯室工作掌權，已買少見少，所以當明報老闆張曉卿要將佢調走，傳媒人先至會有咁大反應，認為老闆另有政治目的。佢調職後仍遇襲，的而且確會令本地傳媒人心寒，怕偵查報道得罪權貴黑勢力，慢慢陷入自我審查之中。
自梁振英競選伊始，香港逐步變成一個旁門左道，邪風四起之城市，政治文明逐步淪喪，再無一套規矩可言，權謀術士橫行，古靈精怪團體湧現，用一套香港人陌生之野蠻粗暴政治手段，取代英治時代發展出來相對文明的政治文化，正派人士噤聲。
此現象相信是內地維穩之手伸入香港造成，挺梁由黑色人物派錢，特首落區由黑色人物動員護航，然後是鋪天蓋地形形色色整治香港傳媒行動，政治黑手帶頭針對香港新聞自由。
呢一切冇可能係個別獨立事件，而且全部都在梁振英當上特首後發生，劉進圖就是在此大小政治氣候下遇襲受重傷！
今日香港已淪為俄羅斯或菲律賓水平地方，政客以權術為先，用「恐嚇」、「恐懼」為後盾作管治之地方，香港已越來越陌生，「劣勝優亡」，唔通大家就任由香港「俄羅斯化」？十年前香港人集體爆發，五十萬人上街，十年後，大家係時候準備驅魔辟邪，推動香港重回正道之時了。
鬍鬚曾引用夏韶聲交叉點歌詞作預算案總結，香港正處於正邪對戰交叉點！
添馬男