現年48歲嘅天王郭富城遲遲未肯結婚，甘願一直做鑽石王老五，舊年佢同熊黛林分手，當然唔會咁快再為一棵樹放棄成個森林。之前單身城城被爆搭上年齡細成截嘅葉熙琪，有報道指城城近日又主動出擊，漁翁撒網專吼小花，電影《金雞sss》演小雞嘅「魔鬼胸」蔚雨芯、宅男女神吳若希、衛思雅，甚至連周秀娜師妹、𡃁模許雅婷（Kabby）同港視小花黃美棋統統唔放過。有指城城用Instagram同妹妹仔溝通，亦有親臨睇佢哋演出。
風騷嘆麻辣火鍋
有傳城城睇完《金》片仲打畀蔚雨芯讚佢做得好，兩個仲約過食飯，城城又約吳若希唱K，佢𠝹女招不外乎食飯唱K返屋企。獲愛心小雞陪玩嘅城城份外風騷，佢近日去咗台灣，前晚仲去咗太和殿嘆麻辣火鍋，食咗成粒鐘先走。
城城去年捧場睇Kabby做舞台劇，佢哋喺後台齊齊舉V合照，問到影帝可有抄佢牌？Kabby噚日喺電話抵死話：「可能我未吸引到佢嘅愛的呼喚。」城城如約食飯唱K去唔去？Kabby話：「去，畀面佢，不過我帶埋經理人去。」
撰文：馮仁昭