大家去睇樓、租樓時，一定會影無限咁多張相，希望記住間屋個內籠。你話如果可以一部機將成間屋360度影低，咁就真係無得頂。估唔到，Google最近竟然將呢個諗法實現出嚟。
Google日前公佈推出「Project Tango」計劃，負責團隊ATAP（此團隊原屬Motorola，但Google死都唔肯賣畀聯想（992））已成功開發一部配有3D感應器Android原型手機。部機正正就可做到上述功能，只要拎住部機喺一間房內行，就可以即時將周圍環境製作出3D立體地圖。
同Google Glass一樣，Project Tango已準備200部機畀開發者試用。試用未必有你份，但買受惠股就絕對可以參與。Google公佈，舜宇光學（2382）就係項目16個合作夥伴之一，將負責3D攝影機中嘅掃瞄組件，公司預計項目明年起可帶動收入增長。
而話說台灣半導體廠奇景光電有份參與製造Google Glass，直至去年7月，Google話要將Google Glass產能擴大，索性入股奇景光電持6.3%股權，刺激奇景光電股價至今累積升1.6倍。
雖唔知呢部手機會否成搶手貨，但早前有外國傳媒講過舜宇會為Amazon嘅3D手機供應鏡頭，好肯定舜宇已加緊步伐。舜宇股價於6.1元左右已築底，昨日股價突升7%，喺業績前可先炒一轉。
Fifi
本欄逢周二、四刊出