東亞銀行（023）位於中環IFC嘅首間智能數碼分行噚日正式開張，由存錢到買賣投資產品，全部數碼化，幾乎一張紙都唔使用，仲要晚上8點關門，職員正常時間放工後，就會由觀塘寫字樓嘅職員透過視像提供銀行服務。副行政總裁李民橋（Adrian）話，外國同內地銀行都有去偷師。
大型商場通常唔鍾意租舖位畀銀行，嫌佢哋比其他商戶早收工，舖位熄燈後搞到冇晒人氣。原來東亞呢間IFC分行只屬短期租約，Adrian聲稱，業主見佢哋個室內設計圖靚，於是租舖位畀佢哋。佢哋用咗13日完成裝修，上月初試業，營業至今年6月底，之後都有意繼續物色商場舖。
東亞亦計劃開多幾間智能數碼分行，今年內會開多三間，其中一間將會落戶銅鑼灣。