近日因為同老公曾智明婚變，以及被爆搭上新歡免稅店大王鄭應南嘅黎瑞恩，是非都好多下，好似上星期日(23號)，佢就喺微博寫道:「做朋友做咗接近17年，噚日終於睇清楚你喺我心目中，朋友嘅定義係，你有事我第一時間沖（衝）出嚟幫手，兩脅（脇）插刀」，令人猜測呢位出賣小恩子嘅朋友係邊位，早前有傳係湯寶如，不過噚日小恩子就放咗同湯記及劉小慧等人去玩嘅相，謠言不攻自破。
而噚日就有報道話，原來小恩子呢位識咗17年嘅朋友，係車婉婉。相識17年，據知小恩子都對車婉婉好好，好似之前婉婉打理母親遺下的「車氏粵菜軒」一度周轉不靈，小恩子立即借出80萬助她渡過困景，仲要求曾智明幫拖，多約一班富二代去「車氏」開飯，不過咁樣就搞到曾智明同婉婉愈來愈Friend，後來婉婉知道曾智明玩得愈來愈過份，同個廣州女人一齊兩年，搞到同小恩子離婚，但婉婉竟然企喺曾智明嗰邊。
之前小恩子同鄭應南傳出相戀數月時，車婉婉冇撐，仲同對方割蓆，報道指小恩子同鄭應南一齊之後，婉婉周圍唱佢，搞到一班朋友疏遠小恩子，後來小恩子喺朋友度聽返呢件事好傷心，佢打電話質問婉婉，但婉婉態度就好寸，自此兩人割蓆，不相往還。
而內地富婆Laura Lee日前亦喺微博留言挺黎瑞恩：「阿恩，通過某件事，讓某些人露出真面目是好事﹗遠離魔鬼，更多天使守護在你身邊。」