港交所（388）業績相當一般，但行政總裁李小加份「糧單」就好搶眼，皆因計埋花紅同股份，佢舊年足足袋走超過3,800萬元，比2012年多56%，恨死唔少打工仔。不過，同期港交所只係多賺11.5%，全年股價仲要逆市跌2%，小加係咪交到功課，就見仁見智嘞！
根據港交所業績公佈，李小加舊年年薪有865萬元，即係平均每個月袋超過70萬，表現花紅就等於13個月糧，有937萬元，增加43%。最厲害係分到價值1,892萬元嘅股份酬金，加埋其他福利，年薪合共3,820萬元，加薪56%。
李小加2010年初正式做行政總裁，相比之下，幾年人工已經翻一番，認真係筍工一份。
不過，李小加上任至今四年有多，港交所股價累計下跌超過一成，佢推出嘅新措施又搞到唔少華資行經紀一肚氣，佢每年收咁大筆人工，唔知班股東同業界又有乜意見呢？