立法會議員何俊仁噚日一邊聽住財爺宣讀財政預算案，一邊用平板電腦睇索女，仲要被人影到斷正，呢單料真係笑爆全城。其實今時今日好多人都係機不離手，即使係上市公司管理層開會，老闆都好少叫大家唔准用平板電腦或手機，因為真係要用來睇實個市或者睇資料，老闆們都係諗住大家咁大個人，識得自律㗎啦。
新世界發展（017）主席鄭家純噚日都話，平時跟其他管理層開會，佢哋都可以用智能手機、平板電腦。至於擔唔擔心員工分心，佢就話對員工有信心，「對員工一定要有信心，成日擔心，咁多員工點擔心得咁多！」不過，佢自己就冇用iPad嘅。
國泰無紙化 板腦當文件
耀才證券（1428）老闆葉茂林亦都話冇乜所謂，冇話明文規定唔可以開會用手機、電腦，佢間中都見同事開會時篤吓篤吓部機，「但我當佢哋聽緊（開會內容）㗎，應該係一路聽，一路做記錄啩。」
聽聞，國泰航空（293）行政總裁史樂山亦好開通，雖然佢開會時少用平板電腦，但唔會叫同事唔用，加上國泰內部實行無紙化，開會好少再一人一大叠文件，各位仁兄多數開住部平板電腦睇文件開會。
康宏（1019）主席王利民就分享一單笑料，佢話有次靜雞雞走去旁聽一個員工會議，佢坐埋一邊，邊聽邊睇手機，竟然發現有位開緊會嘅同事喺面書玩緊candy crush，玩到搵人畀命佢，王主席當然忍唔到手，即刻喺面書寸對方，話佢唔專心。
其實同得老闆開會，好少人夠膽拎部機睇無謂嘢，唔通博炒咩？真係悶到瞓，睇股票報價咪好囉，或者索性買防偷睇貼啦。
李華華
mailto:[email protected]