星期一中午出外吃午飯之前，睇到now 332台一個鏡頭，就係立法會內，有寥寥數人開會，絕大部份議員唔見人影，大概已經去咗吃飯啩。有指駡一方，就係范國威議員，高聲指責旅發局主席林建岳：「你幾時會開放你嘅屋企俾遊客呀？」此問題十分無厘頭，可說公私不分。林建岳答唔會，指旅遊業有一百萬人賴以為生。
有錢人做無糧工作，付出不少時間，而時間即是金錢，可以講得係俾錢買難受。岳少為咗自由行遊客太多嘅問題，久唔久就俾人破口大駡，都唔知為乜。
我地好彩無官無職一身輕，睇完電視新聞，笑一笑，就吃午飯去也。今次係一年一度某傳媒營業總監L請左丁山吃飯，地點就係置地廣場嘅「唐人館」（China Tang），即以前超市360（Three-Sixty）嘅所在地。總監L問左丁山：「呢啲Island Tang，Kowloon Tang，China Tang等係唔係同一集團經營㗎？」梗係啦，咪就係岳少嘅麗新集團囉。麗新近年鍾意開發餐飲生意，搞意大利菜，8 1/2就係旗艦星級名店，粵菜有「唐人館」等等，上海菜有「夜上海」，日本菜亦有兩三間最高價嘅料理，好似間間都賺錢噃，可見岳少手下嘅餐飲人才的確有料到。
呢間唐人館收費冇都爹利會館咁貴，產品質素則較為優勝，中午當然全場爆棚，至於夜市，在中環當然好有挑戰性啦，不在話下。
營業L係狗癡，養咗一隻小狗，視如珍寶，問佢旅行點樣處理隻狗，佢竟然話：「帶埋去。」嚇咗左丁山一跳，點帶呀？佢上網搜尋資料好耐，發現日本大阪對狗最仁慈，只要狗主帶齊一切認可衞生健康文件（例如防疫針紙），在大阪機場可以當日出關，唔駛扣留幾日嚟檢疫。於是佢買咗一隻特製狗籠，精心策劃，預備與隻狗一齊到大阪及關西旅行，費用呢？機票及雜費，狗與人差不多。咁苦心為咗隻狗，祝佢一切安排順利啦！