何超儀(Josie)向來我行我素，喜歡便去做，承認自戀天性，放下何家淑女的光環，趙啷啷之後，新片再出演風俗娘，犧牲色相說的不是裸露賣肉，而是要增肥15磅，兼穿着老土騎呢，high爆演出一貫何超式去到盡的作風，但Josie卻不忘幽默自嘲問句：「點解無人搵我演靚女？」
撰文：鄧卓嶽
何超儀狂愛電影，街知巷聞，豪門何家淑女，曾經家人反對入行，至今西班牙影后攞過、荷李活亦留低過腳毛，身體力行證明自己當初決定並非玩票性質，「你睇吓大家今晚開工開幾多個鐘，我都跟住喺度，如果入行14、15年都係玩票嘅，咁講嗰個可能要睇吓醫生。」不在乎外界對她的想法，因為在Josie眼中家人的認同才是最重要。早已接受了活在賭王爸爸的影子底下，只希望做出令他驕傲的成績，「其實佢一直都好支持，佢都同我講話你係做呢份工㗎喇。」
拒扮演媽媽
每次挑選角色Josie總愛挑戰自己，性工作者、同性戀、殺人狂、啞巴，好像真的沒有底線，當然事實並非如此，「露三點一定唔得啦，媽媽角色都盡量唔想，不過最近都做好多，做埋呢幾次唔再做媽咪啦，因為年紀越大，畀我啲仔就越嚟越大。」私底下曾有過當媽媽的念頭？Josie斬釘截鐵，「唔想生BB，最起碼要有番咁大，我先可以溝通得到。」
烈女也驚青
十年前的趙啷啷勇奪金像獎女配角，十年磨煉搖身一變女主角。《豪情3D》出爐前人人把焦點放在肌男杜汶澤與AV女郎肉搏，其實Josie的戲份也極搶，「今次角色是上次趙啷啷的加強版，性格更儍更蠢，大情大性都有啲似我自己。」AV主題露骨，烈女Josie亦覺得尷尬，「最尷尬當然係啲情慾戲，同埋現場見到一班汁男，唔知佢哋真定假，但個樣就好真實。一roll機就有四個男人行到好近，佢哋就喺旁邊自摸，真係幾恐怖，驚過拍殺人、流血嘅戲。」
新戲再與阿澤合作，Josie更表示阿澤是她的幸運星，「每次同阿澤合作我都會攞獎，上次合作《地久天長》我攞咗金紫荊最佳女配角，係我人生第一個獎項。再次合作我覺得佢變得偉大咗，一個演員嘅moment好緊要，但係佢會同其他演員分享，諗到嘅橋都好絕，監製、導演、編劇都會一致拍爛手掌。」
二選一難題
拍戲、唱歌是Josie兩大興趣，嘗試給個難題強迫她二選一，「我揀唱歌，拍戲太辛苦，唔值得。始終我係歌手出身，會有少少自戀，唱歌上咗台，個台就係你嘅，想點都得，可以自己話事。拍戲要講team spirit，收到劇本就照辦事，唔可以好好表達自己，辛苦完又未必做到自己想做嘅嘢。所以今年工作上應該會再揀擇啲，又或者唔做咯。唔做係咪型啲先？」
造型：顏英儀
攝影：郭賢興
髮型：Ben Lee of AGLOW PRIVATE I SALON
化妝：Ling Chan of Zing the Makeup School
場地：E-Max
更多精采時尚內容，盡在 http://add.appledaily.com。