做生意，最好當然係產品又賣得，食水又夠深。但如果市場轉變，迫你兩者要犧牲一樣，那麼應該當機立斷，選擇賺少啲去keep銷量，還是「歎慢板」慢慢賣，盡量維持利潤水平？海迪勢估唔到，「鞋王」百麗（1880）似乎選擇了後者。
百麗鞋類業務毛利率去年達68.7%，經營溢利率22.9%。首席執行官盛百椒曾笑言，百麗利潤率已經要超越LV了（去年LV毛利率及經營溢利率為65.5%及20.2%，真係低過百麗）。當然，兩間公司結構、業務不盡相同，難以直接比較。但LV經營的是真正「品牌」，年年花大手筆做廣告宣傳；而百麗旗下牌子，有冇咁強大品牌效應，令佢可以勁到有同國際名牌媲美的利潤率？
百麗過往成功，與百貨公司高速增長息息相關。由於百麗擁有國內十多個最主要的鞋履牌子，令它在傾租約時，有着無可匹敵的議價能力：一係就N咁多牌子逼晒入去，一係就一個都唔入。這其實是種壟斷優勢。時移勢易，網購冒起，令更多細經營商都可在網上平台一同競爭。故現在要鬥的是回歸生意最基本：你產品本身夠唔夠競爭力？係咪真係value for money？這才是百麗應該要回應的問題。
後記：其實海迪今日無冇心情寫股票。願所有新聞工作者平安，繼續堅守崗位。
海迪