以往無論宣讀施政報告或者財政預算案，議員都會準時坐齊喺會議廳等住聽，但唔知係咪呢份預算案，之前放料太多冇晒驚喜，噚日財爺曾俊華公佈嘅一刻，會議廳嘅空凳特別多，至少15位建制派、13位泛民唔見人，部份遲大到，有人甚至冇出席，唔係唔畀面到咁呀？
之不過，出席亦唔代表尊重㗎，包括官員在內。例如中策組首席顧問邵善波開始冇耐幾乎已進入昏睡狀態，囤地波就除眼鏡，廿蚊張托腮、民建聯梁志祥猛捽雙眼標埋眼水，「小爬蟲」黃定光、元秋、李慧琼都不斷放蚊，保安局局長黎棟國就睇新聞App解悶。瞓唔着嘅議員就不斷上網，做低頭族玩電話，據聞會議廳內個個㩒手機，互相向友人打聽，劉進圖到底傷成點？
要數全場最留心聽預算案嘅，非鬍鬚曾太太莫屬，坐喺公眾席嘅曾太噚日以堅定意志捧老公場，冇恰過眼瞓，同坐喺佢前一排，瞇埋眼閉目養神嘅行會成員如鄭耀棠，以及低頭寫notes嘅林煥光以及低頭唔知分心做緊乜嘅史美倫，有好大對比囉。
